É para min unha honra e unha gran responsabilidade estar á fronte do Goberno Local de Beade durante os próximos catro anos. O noso principal obxectivo durante este tempo será que todos os veciños e veciñas do municipio sintan que o Concello é a súa casa, un lugar onde trataremos de dar solución ás súas demandas, un punto de encontro onde facer de Beade unha localidade aínda mellor para vivir, sempre de xeito participativo, contando coa opinión da cidadanía.
Para isto fanse máis necesarias que nunca todas as canles de comunicación posibles, portais a través dos que dar cumprida conta do noso traballo e trasladar a información de maior utilidade para a veciñanza. O Concello en xeral, e eu como alcalde en particular, queremos escoitarvos.
Así que, con estas premisas, dámosvos a benvida a nosa páxina web, un nexo máis entre a cidadanía e concello e unha fiestra para aqueles que se queiran achegar a coñecernos. Temos moito que ofrecerlles. Lembravos tamén que podedes seguir toda actualidade a través da páxina de Facebook Concello de Beade.
Nas nosas mans, nas de todos, está loitar porque vivir no rural non supoña unha utopía, por contar coas mesmas oportunidades e frear a crise demográfica que nos asola. Porque o futuro dos 300 veciños de Beade importa tanto como o dos 300.000 dunha gran cidade.
Benvidos, benvidas, e gracias unha vez máis pola confianza depositada.
Fernando Taboada
